Эстониялик эркак скутерда тезликни оширгани учун қамалди
Шунингдек, у ҳайдовчилик гувоҳномасига эга бўлмаган.
Эстония суди электр скутерида тезликни оширган 48 ёшли эркакни икки ойга қамоқ жазосига ҳукм қилди.
2023 йил август ойида полиция Нарва шаҳрида яшовчи эркакни рухсат этилган 25 км/соат тезлик ўрнига 55 км/соат тезликда ҳаракатлангани учун тўхтатган. Шунингдек, у ҳайдовчилик гувоҳномасига эга бўлмаган. Аввалроқ суд электр скутерни мототцикл сифатида баҳолаб бўлмаслигини ва шу сабаб ҳайдовчилик гувоҳномаси талаб қилинмаслигини айтган эди.
Бироқ Эстония Олий суди бу қарорни қайта кўриб чиқишга мажбур бўлди. Қуйи суд судланувчининг илгари ҳам йўл ҳаракати қоидаларини бир неча бор бузганини ҳисобга олиб, унга икки ойлик қамоқ жазоси тайинлади. Ҳимоячининг шикояти рад этилди ва ҳукм қонуний кучга кирди.
