Ўзбекистонда янги қўмита ташкил этилади
Ташаббус миллий тотувликни янада мустаҳкамлашга қаратилган.
Ўзбекистонда Миллатлараро муносабатлар ва хориждаги ватандошлар масалалари бўйича қўмита ташкил этилиши ҳақида Президент фармони қабул қилинди. Ушбу янги қўмита мамлакатдаги миллий тотувликни мустаҳкамлаш, жамиятда ўзаро ҳурмат ва бағрикенгликни ривожлантириш, шунингдек, хориждаги ватандошлар билан алоқаларни мустаҳкамлаш билан шуғулланади.
Бу қўмита илгари мавжуд бўлган Миллатлараро муносабатлар ва хорижий мамлакатлар билан дўстлик алоқалари қўмитаси негизида ташкил этилади. У давлат сиёсатини амалга оширувчи ва мувофиқлаштирувчи асосий орган сифатида фаолият юритади.
Шунингдек, ҳар йили “Ўзбекистон ягона Ватан!” шиори остида миллатлараро ҳамжиҳатлик ва ватандошларнинг мамлакат ривожига қўшаётган ҳиссаси таъкидланадиган махсус анжуман ўтказилади. Хориждаги ўзбеклар учун эса “Uz Global Think” форуми ташкил қилинади.
Бу янги ташаббус Ўзбекистонда миллий тотувликни янада мустаҳкамлаш ва мамлакатнинг кўп миллатли жамият сифатидаги ижобий имижини оширишга қаратилган.
