Европа “ақлли” снайпер ўқи ишлаб чиқмоқда
Ўқ отиш аниқлигида янги давр бошланмоқда.
Европада илғор ҳарбий технологиялар йўналишида муҳим қадам ташланди. Франко-Германия Сент-Луис тадқиқот институти (ИСЛ) янги авлод снайпер ўқини ишлаб чиқишни эълон қилди. I-SMART (ИСЛ Снипер Мунитион Астуатед то Реач Таргет) номи билан танилган ушбу лойиҳа снайпер зарбаларининг аниқлигини кескин оширишга қаратилган.
Мазкур ўқ диаметри 12,7 миллиметр бўлиб, у турли илғор компонентлар — оптик тизимлар, навигация электроникаси, электр манбаи ва алоқа қурилмалари билан жиҳозланиши кўзда тутилган. Муҳандислар бу орқали ўқнинг парвози давомида ерда жойлашган снайпер станцияси билан алоқа ўрнатиши ва йўналишини реал вақтда тўғрилаши мумкин бўлишини режалаштиришмоқда. Бу технология зарба аниқлигини инқилобий даражада ошириши кутилмоқда.
Шу билан бирга, бу ҳажмдаги ўқ ичига бундай мураккаб электроника ўрнатиш техник жиҳатдан ниҳоятда мураккаб вазифа бўлиб қолмоқда. Ўқ узунлиги атиги 54 миллиметр бўлсада, ички элементлар отиш вақтида юзага келадиган кучли тезлашувга бардош бериши лозим. Бироқ лойиҳа аллақачон босқичма-босқич синовларга киришган — баъзи компонентлар шамол туннелида муваффақиятли текширувдан ўтказилган. Бу эса ҳарбий технологиялар тарихида янги саҳифанинг очилишидан дарак бермоқда.
