Японияда об-ҳаво прогнозлари AI ёрдамида аниқланади

Япониянинг Метеорология агентлиги об-ҳаво прогнозларини янада аниқлаштириш мақсадида сунъий интеллект (AI) технологиясини қўллашни бошлади. AI технологияси об-ҳаво башоратларида, жумладан тайфунлар, ёғингарчилик ва фавқулодда ҳолатларни олдиндан аниқлашда самарали бўлиши кутилмоқда.

 

Янги тизим чуқур ўрганиш (deep learning) асосида ишлайди ва тарихий об-ҳаво маълумотлари билан бирга реал вақтдаги кузатувларни таҳлил қилиб, аниқ прогнозлар ишлаб чиқади. Бу метод сунъий интеллектга вақт ўтиши билан об-ҳаво шароитларини яхшироқ тушуниш имконини беради.

 

Биринчи босқичда сунъий интеллект мавжуд суперкомпютер тизимлари билан биргаликда ишлайди. Бу технология синоптик мутахассисларни тўлиқ алмаштиришга қаратилмаган, балки уларга кучли таҳлилий воситалар тақдим этиш мақсад қилинмоқда. Янги тизим айниқса тайфун йўналишини, ёмғир эҳтимолини аниқлаш ва ноодатий иқлим ҳолатларини прогноз қилишда фойдали бўлади.

 

Апрель ойида махсус ишчи гуруҳ ташкил этилган бўлиб, июнь ойида технологияни тўлиқ жорий этиш бўйича қўшимча чора-тадбирлар эълон қилинади. Ҳозирда сунъий интеллект тизими мослашув босқичида, бироқ япон мутахассисларининг фикрича, бу алгоритмлар яқин келажакда об-ҳаво башоратларини сезиларли даражада такомиллаштиради.