Саудияда дунёдаги биринчи шифокорларсиз клиника очилди

2025 йил апрель ойидан бошлаб Саудиянинг шарқий Al-Ahsa минтақасида сунъий интеллектга асосланган биринчи клиника ўз фаолиятини бошлади. Клиникани Хитойнинг Шанхайда жойлашган тиббий технологиялар компанияси Synyi AI Almoosa Health Group билан ҳамкорликда очди.

 

Ушбу инновацион клиникада беморларни "Dr. Hua" деб номланган сунъий интеллект шифокори қабул қилади. У бемор аломатларини планшет орқали қабул қилиб, юрак фаолияти графиклари, рентген тасвирлари каби маълумотларни таҳлил қилади. Dr. Hua тайёрлаган даволаш режалари инсон шифокори томонидан кўриб чиқилади ва тасдиқланади.

 

Ҳозирча хизмат бепул тақдим этилмоқда ва фақатгина нафас йўллари билан боғлиқ 30 га яқин касалликларни — масалан, астма ва фарингитни — даволаш билан чекланган. Synyi AI келгуси йилда бу рўйхатни 50 та касалликка етказишни, шунингдек, бошқа Саудия касалхоналари билан ҳамкорликда янги сунъий интеллект клиникаларини очишни режалаштирмоқда.

 

Synyi AI компанияси 2016 йилда ташкил топган бўлиб,  Tencent, Hongshan Capital, GGV Capital ва Хитой маҳаллий ҳукуматлари томонидан молиялаштирилган. У Хитойда 800 дан ортиқ шифохона ва илмий муассасалар билан ишлаган. Саудия эса компания учун биринчи халқаро бозор ҳисобланади.