Абдуманноп Саноқовга “Жасорат” медали берилди
У каналга тушиб кетган икки нафар қизалоқни қутқариб қолган.
5 май куни Тошкент шаҳридаги Бўрижар каналида юз берган фожеали ҳодиса бутун халқимизни ларзага солди. Якассарой туманида яшовчи икки нафар қизалоқ каналга тушиб кетганини кўрган жасур юртдошимиз Абдуманноп Саноқов ўзини сувга ташлаб, болаларни қутқаришга эришди. Афсуски, у бу фидоийлик йўлида ҳалок бўлди.
Маълум қилинишича, Абдуманноп Саноқов доимо инсонларга ёрдам беришга шай, эл дарди билан яшаган ватанпарвар инсон бўлган.
Ўзбекистон Республикаси Президенти марҳумнинг рафиқаси ва фарзандларига чуқур ҳамдардлик билдирди ҳамда Абдуманноп Саноқовни “Жасорат” медали билан мукофотлаш тўғрисидаги фармонни имзолади.
Шу билан бирга, қутқарувда фаол иштирок этган "Бўрижар" спорт мажмуаси ходими Нурмуҳаммад Мамасалиев ҳам “Жасорат” медали билан тақдирланди.
Бу қарор мамлакатимизда инсон қадри ва фидоийликни эъзозлаш, ҳақиқий қаҳрамонларга юксак эҳтиром кўрсатишнинг амалий ифодасидир. Инсонийлик қадриятларига таянадиган жамиятда бундай эзгу ишлари ҳеч қачон унут бўлмайди.
