Ўзбекистонлик талабалар Германияга ишлашга кетиб уйсиз қолган

Ўзбекистоннинг Франкфурт-на-Майн шаҳридаги Бош консуллиги Германияга Work and Travel дастури бўйича келган ва оғир аҳволга тушиб қолган бир гуруҳ Қорақалпоқ давлат университети талабаларига амалий ёрдам кўрсатди.

 

Ташкилий носозликлар ва иш берувчи билан келишмовчиликлар туфайли 14 нафар талаба вақтинчалик иш жойига етиб боролмай, уй-жойсиз қолган. Германияда истиқомат қилаётган ватандошлар ёрдами билан ёшлар Бош консуллик биносига олиб кетилди.

 

Дипломатик миссия ходимлари талабалар билан тушунтириш суҳбати ўтказди, уларни мамлакатда бўлиш қоидалари, шахсий хавфсизлик чоралари билан таништирди, шунингдек, ҳужжатлар ва шахсий мулкни сақлаш муҳимлигини эслатди.

 

Улар вақтинча меҳмонхонага жойлаштирилди. Бундан ташқари, дипломатлар бандлик дастурини мувофиқлаштирувчи немис воситачи компанияси вакиллари билан музокаралар ўтказди. Натижада ўзбекистонлик ёшларни расмий ишга жойлаштириш масаласини имкон қадар тезроқ ҳал этиш бўйича келишувга эришилди.