Германия ва Италия АҚШдаги олтинини қайтаришни муҳокама қилмоқда
Трамп сиёсати фонида Европа давлатлари олтинини ватанга қайтармоқчи.
Доналд Трамп маъмуриятининг АҚШ Федерал Резервига нисбатан танқидлари ва глобал геосиёсий беқарорлик фонида Германия ва Италия ўз олтин захираларини АҚШдан ватанга қайтаришни режалаштирмоқда.
Жаҳон Олтин Кенгаши маълумотларига кўра, Германия (3 352 тонна) ва Италия (2 452 тонна) олтин захиралари бўйича дунёда иккинчи ва учинчи ўринда туради. Ҳар икки мамлакат олтинининг катта қисми Нью-Йоркдаги Федерал Резерв банкида сақланади. Бу тарихий сабабларга кўра юзага келган бўлсада, бугунги кунда кўплаб сиёсатчилар бу амалиётни қайта кўриб чиқиш зарурлигини таъкидлашмоқда.
Германияда олтинни қайтариш ғояси сиёсий спектрнинг турли қатламларида қўллаб-қувватланмоқда. Собиқ депутат Питер Гаувайлер бу борада Бундесбанк ҳеч қандай имтиёзга эга бўлмаслиги кераклигини айтган бўлса, “AfD” партияси аъзоси Питер Берингер олтин “марказий банклар учун сўнгги чора” эканини ва у тўлиқ назоратда бўлиши лозимлигини таъкидлайди.
2013 йилда Германия Париж ва Нью-Йоркдан 674 тонна олтинни қайтарган ва бу операция 7 миллион еврога тушган эди. Айни пайтда Германия олтин захирасининг 37 фоизи ҳали ҳам АҚШда сақланмоқда.
Италияда эса, бош вазир Жоржия Мелони илгари мухолифатда бўлган пайтда олтинни ватанга қайтаришни ёқлаган, аммо ҳокимиятга келгач, бу борада расмий ҳаракат қилмаган. Унинг партиядоши Фабио Рампелли Италия олтини “тарихий иттифоқчи” томонидан сақланаётганини эслатиб ўтган.
Бу орада, Европа солиқ тўловчилар ассоциацияси Германия ва Италия молия идораларига мурожаат қилиб, Федерал Резервга ҳаддан ташқари ишончдан воз кечишга чақирди.
Ташкилот раҳбари Майкл Еагер: “Биз олтин устидан чексиз назоратни кафолатлаш учун уни уйга қайтаришни тавсия қиламиз”, — деди.
Глобал сўров натижалари ҳам шуни кўрсатмоқдаки, марказий банклар инқироз пайтида ўз олтин захираларига реал кириш имкониятини исташмоқда.
