Тошкентда ўзини тартибга чақирган қизни ҳақоратлаган йигитга чора кўрилди
Йигитнинг ҳовуздан балиқни олганига қиз эътироз билдирган.
Ижтимоий тармоқларда ҳовуздаги балиқни қўли билан ушлаган йигит унга эътироз билдирган аёлни ҳақорат қилганлиги ҳолати акс этган видео тарқалиб, турли муҳокамаларга сабаб бўлмоқда. Ҳолат юзасидан шаҳар ИИББ расмий муносабат билдирди.
Қайд этилишича, жорий йилнинг 23 июнь куни соат 22:00 ларда Мирзо Улуғбек туманида жойлашган истироҳат боғларининг бирида 2003 йилда туғилган M.Ш. ҳовуздаги балиқни сувдан чиқарган ҳолда қўли билан ушлаб олган. Унинг бу ҳаракатига 2000 йилда туғилган Д.A. эътироз билдирган ва балиқни сувга қўйиб юборишини сўраган. Бироқ M.Ш жамоат жойида бўла туриб, Д.А га уятли сўзлар билан сўкиниб, жамиятда юриш-туриш қоидаларини қасддан бузган.
Мазкур ҳолат юзасидан Мирзо Улуғбек тумани ИИО ФМБ томонидан фуқаро M.Sh. га нисбатан Маъмурий жавобгарлик тўғрисидаги кодексининг 183-моддаси (“Майда безорилик”) аломатлари билан маъмурий баённома расмийлаштирилган. Ҳужжатлар қонуний чора кўриш учун Жиноят ишлари бўйича Мирзо Улуғбек туман судига юборилган.
