Энди сиртқи таълим бекор қилинди
Қарор таълим сифатининг етарли даражада таъминланмагани сабабли қабул қилинган.
Ўзбекистонда сиртқи таълим шакли расман тугатилди. Бу ҳақда Олий таълим, фан ва инновациялар вазири Қўнғиротбой Шарипов маълум қилди. Унинг айтишича, бу қарор таълим сифатининг етарли даражада таъминланмагани сабабли қабул қилинган.
“Кўпчилик сиртқида ўқиётган талабаларнинг асосий муаммоси — иш билан бандлик ва дарсларга қатнаша олмаслик. Шу сабабли таълим сифати сусаймоқда. Буни яширишнинг ҳожати йўқ”, деди вазир. Эндиликда янги ўқув йилидан бошлаб сиртқи шаклга қабул тўхтатилади.
Вазирнинг сўзларига кўра, сиртқининг ўрнини масофавий ва узайтирилган таълим шакллари эгаллайди. Масофавий таълимда қатъий назорат жорий этилади — ҳар бир талаба компьютер орқали дарсга киради, имтиҳон пайтида эса инсонга эмас, тизимга тааллуқли қоидалар амал қилади. “Ўрнига кирмоқчи бўлганлар ёки ъшпаргалкаʼ ишлатмоқчи бўлсалар, тизим уларни автоматик равишда блоклайди”, — деди Шарипов.
Шу билан бирга, ҳозирда сиртқида таҳсил олаётган талабалар ўқишни белгиланган тартибда давом эттирадилар. Улар амалдаги ўқув дастурлар асосида диплом олиш имкониятига эга бўлиб, ушбу дипломлар бошқа таълим шакллари билан тенг ҳуқуқли ҳисобланади. Вазир, шунингдек, янги тизим халқаро тажрибага асосланганини, хорижлик профессорлар жалб этилаётганини таъкидлади.
