Фарғонада чиқинди учун 2 млрд сўм асоссиз пул ундирилди

Жорий йилда Рақобат қўмитаси ва унинг ҳудудий бошқармаларига чиқинди ташиш хизмати бўйича фуқаролардан кўплаб норозилик мурожаатлари келиб тушганлиги сабабли чиқинди хизматларидан ундирилган жами 2 млрд сўмни қайтариш чоралари кўрилаётгани маълум қилинди.

 

Фарғона вилоятининг Қува туманидан тушган ўндан ортиқ мурожаатлар таҳлил қилинганда, хонадондан чиқинди ташиб кетилмаётгани, аҳолининг аниқ сонига мос равишда тўлов белгиланмаслиги ва хизматларнинг белгиланган графикда кўрсатилмаслиги ҳолатлари аниқланган. 2 нафар фуқаро истиқомат қилаётган хонадондан чиқинди ташиб кетилмаган ва бундан ташқари ҳисоб-китобда 5 киши учун ҳақ ундирилган.

 

МЧЖ томонидан янги тарифлар аҳолига ўз вақтида эълон қилинмаган ҳолда қўлланилганлиги туфайли 2024–2025 йиллар мобайнида Қува туман филиали томонидан юқори тариф қўлланилиши натижасида 264 млн сўмдан ортиқ, Фарғона шаҳар филиали томонидан 17 млн сўмга яқин маблағлар ортиқча ҳисобланганлиги аниқланган.

 

Шунингдек, Қува туманидаги Байналминал, Жалаер, Ифтихор, Катта Қашқар, Мустақиллик, Намуна, Суфи МФЙларига Вазирлар Маҳкамасининг 2019 йил 6 февралдаги 95-сонли қарор талаблари асосида хизмат кўрсатилмаганлиги натижасида 1.7 млрд сўмдан зиёд ортиқча маблағ ҳисобланганлиги маълум бўлган.