Номаълум шахслар автомобилларни ноқонуний равишда Тожикистонга олиб чиқаётгани фош этилди
Ўзбекистонда рўйхатдан ўтган 59 та автомашина ноқонуний тарзда сотилган.
Тошкент шаҳри ҳамда Тошкент ва Наманган вилоятларидаги божхона идоралари тезкор ходимлари томонидан олиб борилган махсус тадбирлар давомида, Ўзбекистон ҳудудида рўйхатдан ўтган енгил автомобилларни Тожикистонга олиб чиқиш ва у ерда ноқонуний реализация қилиш билан шуғулланиб келган 8 нафар шахс фаолияти фош этилди.
Олиб борилган текширувларга кўра, ушбу шахслар “BYD”, “VOLKSWAGEN”, “KAIYI X3”, “HONDA”, “GEOMETRY”, “FAW ID4” ва бошқа русумлардаги жами 59 дона автомашинани ҳар бирини 100–200 АҚШ доллари эвазига Тожикистон Республикасига етказиб берган. Автомобиллар кейинчалик қўшни мамлакат ҳудудида ноқонуний тарзда сотиб юборилган.
Мазкур ҳолатлар юзасидан Давлат божхона қўмитасининг Суриштирув ва маъмурий амалиёт бошқармаси томонидан терговга қадар текширув ишлари бошлаб юборилди. Натижада Жиноят кодексининг тегишли моддаларига асосан жиноят иши қўзғатилиб, материаллар ваколатли тергов органига топширилди.
