“Жарима майдончаси” модули: Тошкентда жарима майдончалари бўйича янги тартиб
Қонунчиликни бузганлик учун ушланган транспорт воситаларини вақтинча сақлаш жойларига олиб келиш, жойлаштириш ва сақлаш тартиби белгиланди.
Тошкентда қонунчиликни бузганлик учун ушланган транспорт воситаларини вақтинча сақлаш жойларига олиб келиш, жойлаштириш ва сақлаш тартиби белгиланди. Бу Ҳукуматнинг 22 сентябрдаги 508-сон қарори билан тасдиқланган низомда назарда тутилган.
Янги низом Тошкент шаҳрида қонунчилик ҳужжатларини бузганлик учун ушланган транспорт воситаларини вақтинча сақлаш жойларига олиб келиш, жойлаштириш ва сақлаш тартибини белгилайди.
Унга кўра, ваколатли давлат органи транспорт воситасини жарима майдончасига жойлаштириш ҳақида қарор қабул қилганда, бу ҳақдаги маълумот «Жарима майдончаси» модули орқали тегишли давлат органлари ва хизмат кўрсатувчи юридик шахсларга юборилади.
Транспорт воситасини бошқаришдан четлаштириш назарда тутилган ҳуқуқбузарликлар содир этилганда, транспорт фақат махсус техника воситалари — эвакуатор ёки манипулятор ёрдамида жарима майдончасига олиб келинади.
Ушланган транспортни сақлаб туриш сабаблари бартараф этилгач, уни жарима майдончасидан олиб чиқишга «Жарима майдончаси» модули орқали рухсат берилади.
Бунда рухсатнома маъмурий ишни кўриб чиқаётган орган мансабдор шахслари томонидан электрон шаклда расмийлаштирилади. Ҳужжат QR-код билан тасдиқланиб, транспорт воситаси ҳайдовчиси ҳамда сақлаш хизматини кўрсатувчи юридик шахсга модул орқали бир иш куни ичида юборилади. Шунингдек, ҳайдовчининг телефон рақамига SMS-хабарнома жўнатилади.
«Жарима майдончаси» модули орқали расмийлаштирилмаган рухсатнома асосида ушланган транспорт воситасини жарима майдончасидан чиқариш тақиқланади.
