Тиббиёт чиқиндиларини йўқ қилишдаги муаммолар: соғлиқни сақлаш вазирига сенатор сўрови юборилди
Тиббиёт чиқиндиларини ёқиш, маиший чиқинди сифатида санитария-тозалаш корхоналарига топшириш ҳолатлари аниқлангани қайд этилди.
Ўзбекистонда тиббиёт чиқиндиларини хавфсиз тўплаш, ташиш ва зарарсизлантириш бўйича амалга оширилаётган ишлар юзасидан соғлиқни сақлаш вазирига сенатор сўрови юборилди.
Сенатнинг Аграр, сув хўжалиги масалалари ва экология қўмитаси раиси А. Туйчиев томонидан юборилган сўровга сенаторлар ва маҳаллий Кенгашлар депутатлари томонидан ҳудудларда ўтказилган ўрганишлар асос бўлган.
Ўрганишлар давомида тиббиёт чиқиндиларини очиқ усулда ёки маиший чиқиндилар билан бирга ёқиш, шунингдек, уларни маиший чиқинди сифатида санитария-тозалаш корхоналарига топшириш ҳолатлари учраётгани аниқланган.
Сенатор сўровида тиббиёт чиқиндиларининг кунлик ҳажмини ягона электрон ҳисобга олиш ҳамда уларни белгиланган тартибда қайта ишлаш корхоналарига тўлиқ йўналтириш бўйича амалга оширилган ишлар ҳақида маълумот сўралган.
Шунингдек, тиббиёт чиқиндиларини тўплаш, ташиш, сақлаш, зарарсизлантириш, утилизатсия қилиш ва қайта ишлашга қўйилган талабларга риоя этилишини таъминлаш бўйича кўрилаётган чора-тадбирлар юзасидан ҳам ахборот бериш сўралган.
