“Самарқанд ноҳат шўраги” географик кўрсаткич сифатида расман рўйхатга олинди

Адлия вазирлиги мазкур миллий таомни расмий тарзда географик кўрсаткич сифатида давлат реестрига киритди.

 

Ўзбек миллий ошхонаси дурдоналаридан бири бўлган, ўзига хос таьми, гўшти ва нони билан ажралиб турувчи “Самарқанд ноҳат шўраги” эндиликда ҳуқуқий мақомга эга бўлди.

 

2025 йил 3 июль куни Адлия вазирлиги ушбу таомни географик кўрсаткич сифатида давлат рўйхатига киритди. Бу ҳақда “Адлия хабарӣ” расмий ахборотида эълон қилинди.

 

Маълумот ўрнида: Географик кўрсаткич — бу маълум бир ҳудуд ёки жой билан боғлиқ маҳсулот ёки таомнинг сифат ва келиб чиқишини ифодаловчи белги ҳисобланади.

 

“Самарқанд ноҳат шўраги”га бундай мақом берилиши бежиз эмас, сабаби:

 

• Унда гўшт ва иликли шўрвалар уйғунлиги мавжуд;

 

• Таом тайёрлашда махсус 1–2 соат хона ҳароратида қуритилган Самарқанд нони ишлатилади;

 

• Энг асосийси, бу таом қадимдан фақат Самарқанд шаҳрига хос бўлган анъанавий усулда пиширилади.

 

Географик кўрсаткич ҳуқуқини тасдиқловчи расмий ҳужжат Самарқанд вилояти адлия бошқармаси бошлиғи Салоҳиддин Сатторов томонидан вилоят ҳокими в.б. Адиз Бобоевга топширилди.

 

Эслатма: Географик кўрсаткичларни рўйхатдан ўтказиш ва уларни ҳуқуқий муҳофаза қилиш бўйича ягона ваколатли орган — Ўзбекистон Республикаси Адлия вазирлиги ҳисобланади.