Самарқандда инспекция бош мутахассиси пора билан қўлга тушди
Ходим 226 миллион сўмлик жаримани 25 миллион сўмгача камайтириш эвазига 3 000 АҚШ доллари миқдорида пора талаб қилган.
Техник жиҳатдан тартибга солиш соҳасида назорат инспекциясининг Самарқанд вилояти бўлими бош мутахассиси хизмат ваколатини суиистеъмол қилганликда гумон қилиниб қўлга олинди. Бу ҳақда Давлат хавфсизлик хизмати ахборот хизмати хабар берди.
Аниқланишича, бош мутахассис Пахтачи туманидаги масъулияти чекланган жамиятлардан бирига қарашли ғишт заводида ўтказилган текширув чоғида аниқланган айрим камчиликларни атайлаб бўрттириб кўрсатган. У гўёки 226 миллион сўмлик сифатсиз ғишт маҳсулотлари ишлаб чиқарилган ва реализация қилинганини айтган.
Шундан сўнг, у расмий текширув ҳужжатларида 226 миллион сўмлик жаримани 25 миллион сўмгача камайтириш эвазига 3 000 АҚШ доллари миқдорида пора талаб қилган.
Давлат хавфсизлик хизмати томонидан ўтказилган тезкор тадбирлар давомида у хизмат хонасида 2 500 АҚШ долларини пора сифатида олаётган вақтда ашёвий далиллар билан қўлга олинди.
Ҳолат юзасидан унга нисбатан Ўзбекистон Республикаси Жиноят кодексининг 210-моддаси 2-қисми «в» банди (манфаат эвазига ноқонуний ҳаракатлар содир этиш) билан жиноят иши қўзғатилди. Суд томонидан унга нисбатан қамоқ эҳтиёт чораси қўлланди.
Ҳозирда тергов ҳаракатлари давом этмоқда.
