20 июлдан хориждан товар олиб кириш тартиби ўзгаради
Ҳаво ва ер орқали олиб кириладиган товарларга янги талаблар белгиланди.
2025 йил 20 июлдан бошлаб жисмоний шахслар томонидан республикага шахсий эҳтиёж учун олиб кириладиган товарларга нисбатан божхона тўловларидан озод қилиш тартибига ўзгартишлар киритилади. Бу ҳақда Давлат божхона қўмитаси маълум қилди.
Маълумки, 2025 йил 1 майдан қуйидаги божхона имтиёзлари амалда эди:
Ҳаво транспортида — 1000 АҚШ долларигача;
Темир йўл ва дарё транспортида — 500 АҚШ долларигача;
Автомобиль ва пиёда ўтиш пунктларида — 300 АҚШ долларигача қийматдаги товарлар бож олинмасдан олиб кирилиши мумкин эди.
Янги тартибга кўра, 2025 йил 20 июлдан бошлаб:
Темир йўл, дарё транспорти ва автомобиль ўтиш пунктлари орқали олиб кирилаётган товарларга божхона имтиёзлари фақат хорижда 2 календарь кун ёки ундан кўп бўлган ҳолларда қўлланилади.
Ҳаво транспортида эса, фуқаро хорижда камида 3 календарь кун бўлган бўлса, бож олинмайди. Акс ҳолда, белгиланган имтиёзлар амал қилмайди.
Мазкур ўзгаришлар божхона назоратини кучайтириш, ноқонуний олиб кирилаётган товарларнинг олдини олиш ва тартибни аниқлаштириш мақсадида жорий қилинмоқда.
