Чилонзорнинг 18–19-кварталларидаги “дом”лар ҳаёт учун хавфли ҳолатда
Ҳолат бўйича сенатор туман ҳокимига сўров юборди.
Олий Мажлис Сенатининг Ёшлар, хотин-қизлар, маданият ва спорт масалалари қўмитаси Тошкент шаҳар Чилонзор туманида аҳоли яшаш шароитлари ва кўп квартирали уйларга кўрсатилаётган хизматлар ҳолатини ўрганди.
Хусусан, туманнинг 18 ва 19-мавзеларида жойлашган уйларга хизмат кўрсатаётган “GRAND GREAT SILK ROAD SERVICE” МЧЖ бошқарув компанияси фаолияти таҳлил қилинди. Таҳлилларда аниқланишича, компания барча мулкдорлар билан белгиланган тартибда бошқарув шартномаси имзоламаган. Бу ҳолат “Кўп квартирали уйларни бошқариш тўғрисида”ги Қонуннинг 28-моддасига зид.
Шунингдек, компания ўзининг молиявий ва хўжалик фаолияти юзасидан мулкдорларга ҳисобот бермаган, умумий йиғилишлар ўтказилмаган. Аҳоли томонидан билдирилган эътирозларга сабаб бўлаётган асосий муаммолар қаторига қуйидагилар киради:
– подъездлар авария ҳолатида;
– ёғоч ромлар ва синган ойналар алмаштирилмаган;
– канализация тизими носоз, электр тармоқлари хавфсизлик талабларига жавоб бермайди;
– фавқулодда ҳолатларда мутахассисларни аҳолининг ўзи ёллашга мажбур бўлмоқда;
– болалар майдончалари ва спорт иншоотлари мавжуд эмас.
2022 йил 29 октябрда ўтказилган йиғилишда ҳам ушбу камчиликлар таъкидланган бўлса-да, амалий чоралар ҳанузгача кўрилмаган.
Мазкур ҳолат юзасидан Сенат қўмитаси раиси Орзигул Козихонова томонидан Чилонзор тумани ҳокими Саидқаххор Холхўжаев номига сенатор сўрови юборилди. Сўровда бошқарув компанияси фаолиятини самарали ташкил этиш бўйича кўрилаётган чора-тадбирлар юзасидан асослантирилган изоҳ бериш сўралган.
