Қамоқдаги ҳоким номидан 1,2 миллиард сўмлик қарорлар имзоланган
Шароф Рашидов тумани ҳокими ҳақида тарқалган хабарлар бўйича расмий текширув бошланди.
Жиззах вилояти Шароф Рашидов тумани ҳокими Маҳмуд Холбўтаев 8 июль куни 10 минг доллар пора олаётган вақтда ДХХ ходимлари томонидан қўлга олиниб, қамоққа олинган эди.
Аммо “E-қарор” тизимидаги маълумотларга кўра, Холбўтаев ҳибсда бўлган кунларда ҳам унинг номидан қарорлар қабул қилинган. Хусусан, 8 ва 9 июль кунлари жами 1,2 миллиард сўм маблағ ажратиш бўйича 5 та маҳаллий кенгаш қарори расмийлаштирилган.
Улардан иккитаси айнан у қўлга олинган 8 июль куни, қолган учтаси эса 9 июль куни қабул қилинган. Барча қарорларда ҳоким Маҳмуд Холбўтаевнинг номи кўрсатилган.
Ижтимоий тармоқларда ушбу ҳолат бўйича тарқалган хабарларга жавобан, Шароф Рашидов туман прокуратураси терговга қадар текширув ишларини бошлаган. бу ҳақда Жиззах вилояти прокуратураси расмий муносабат билдирган.
Текширув натижаларига кўра, ушбу ҳолат юзасидан қонуний қарор қабул қилиниши маълум қилинган.
