Бутунжаҳон Универсиада ўйинларида енгил атлетикачи Шарифа Давронова олтин медални қўлга киритди
Ўзбекистон делегацияси 15 та медал билан рекорд натижани қайд этди.
Германиянинг Рейн-Рур ҳудудида бўлиб ўтган 2025 йилги Бутунжаҳон ёзги Универсиада ўйинларида Ўзбекистон делегацияси иштирокини муваффақиятли якунлади. Мусобақанинг сўнгги кунида енгил атлетикачи Шарифа Давронова ўзининг олтин медали билан ўйинни муносиб тарзда тугатди.
У уч қатлаб сакраш йўналишида 14.33 метр натижа қайд этди. Бу Давронованинг шахсий рекордидир ва айнан шу натижа унга мусобақанинг энг юқори поғонасига кўтарилиш имконини берди.
Умумий ҳисобда Ўзбекистон терма жамоаси 4 та олтин, 4 та кумуш ва 7 та бронза медални қўлга киритди. Бу эса мамлакат тарихида Универсиада ўйинларидаги энг яхши натижа сифатида қайд этилди.
Ўзбекистон Миллий Олимпия қўмитаси маълумотига кўра, бу муваффақият ёш спортчиларимизнинг халқаро майдондаги рақобатбардошлигини ва тайёргарлик даражасини яққол намоён этди.
