Сурхондарёда 4 нафар йигит аварияда вафот этди
Автомашинани “права”си йўқ ўсмир бошқарган.
Сурхондарё вилоятининг Олтинсой туманида одам ўлими билан боғлиқ йўл-транспорт ҳодисаси содир бўлди. Бу ҳақида вилоят ИИББ ЙҲХБ хабар бермоқда.
Қайд этилишича, ҳодиса жорий йилнинг 3 июль куни Олтинсой тумани Жиллибулоғ маҳалласи ҳудудида юз берган. 2006 йилда туғилган ўсмир ўзига тегишли бўлмаган Ласетти русумли автомашинани ҳайдовчилик гувоҳномасига эга бўлмаган ҳолда бошқариб, 4 нафар дўстлари билан бирга тунги соат 22.30 лар атрофида вилоятнинг Олтинсой туманига борган.
Йигитлар шу куни тахминан 23.40 ларда туманнинг Жиллибулоғ маҳалласи ҳудудидан ўтган йўлда бошқарувни йўқотиб, бетон устунга бориб урилган. Ҳодиса оқибатида машина салонида бўлган 2005 йилда туғилган йўловчилардан икки нафари олган тан жароҳати билан воқеа жойида вафот этган.
Яна икки нафари эса олган оғир тан жароҳатлари билан туман шошилинч тиббий хизмат бўлимига ётқизилади. Бироқ улар ҳам кўрсатилган тиббий ёрдамга қарамай, касалхонада вафот этишган.
