Фарғона божхона пости раҳбари 5 минг доллар пора билан қўлга тушди
У контрабандачиларга 80 та iPhone олиб киришга ёрдам берганликда гумон қилинмоқда.
Фарғона вилоятида Давлат хавфсизлик хизмати томонидан ўтказилган тезкор тадбир натижасида чегара ва божхона пости бошлиғи қўлга олинди. У мансаб ваколатларини суистеъмол қилган ҳолда пора олишда гумон қилинмоқда. Бу ҳақда Zamon.uz'га ДХХ хабар қилди.
Аниқланишича, божхона органлари подполковниги Қирғизистондан 80 дона iPhone 16 мобил телефонларни белгиланган божхона тартиб-қоидаларидан четлаб ўтган ҳолда мамлакатга олиб киришга розилик берган. Эвазига у 5 минг АҚШ доллари ҳамда битта iPhone талаб қилган.
Тезкор тадбир давомида мансабдор шахс келишилган пул маблағи ва телефонни олаётган вақтда жиноят устида қўлга олинган.
Мазкур ҳолат юзасидан унга нисбатан Ўзбекистон Республикаси Жиноят кодексининг 210-моддаси (пора олиш) бўйича жиноят иши қўзғатилди. Суд томонидан гумонланувчига қамоққа олиш тарзидаги эҳтиёт чораси қўлланилди.
