Футбол бўйича ДХХ кубогининг финал босқичига қуръа ташланди

2021 йилдан бошлаб республика ёшлари ўртасида футбол ҳамда мини-футбол бўйича Давлат хавфсизлик хизмати кубоги мусобақалари ўтказилиб келинмоқда.

 

Ёшлар ўртасида катта қизиқишга сабаб бўлаётган мазкур оммавий спорт тадбирининг нуфузи ва географияси тобора ортиб бормоқда.

 

Жорий йилда Қорақалпоғистон Республикаси, вилоятлар ва Тошкент шаҳрида ўғил болалар ўртасида футбол ва мини-футбол ҳамда қизлар ўртасида мини-футбол бўйича ДХХ кубоги мусобақалари уч босқичда ўтказилмоқда.

 

Биринчи босқич – туман/шаҳарлар кесимида апрель-май ойларида ўтказилди.

 

Иккинчи босқич – Қорақалпоғистон Республикаси, вилоятлар ва Тошкент шаҳри миқёсида июнь-июль ойларида ўтказилди.

 

Таъкидланишича, бу йилги ДХХ кубоги мусобақалари республика бўйича 254 минг нафардан ортиқ ёшларни қамраб олди.

 

Республика босқичи – 18-23 август кунлари “Бунёдкор” футбол академияси майдонларида ташкил этилиб, унда 42 та жамоа ғолиблик учун курашади. Финал ўйини эса 23 август куни “Жар” стадионида ўтказилади.

 

Бугун, 17 август куни Тошкент шаҳридаги “Бунёдкор” стадионида ёшлар ўртасида ўтказилаётган футбол ва мини-футбол бўйича ДХХ кубоги мусобақаларининг республика босқичи учун қуръа ташлаш маросими бўлиб ўтди. Ўйинлар эртага, 18 август кунидан бошланади.

 

Маълум қилинишича, республика босқичида – ўғил болалар ўртасида футбол ва мини-футбол бўйича ғолиб бўлган жамоалар маҳалласига мини-футбол майдони, 2-ўринни эгаллаган жамоалар учун универсал спорт майдони (баскетбол ва волейбол ўйинлари учун мўлжалланган), 3-ўринни эгаллаган жамоалар маҳалласига “Стритбол” (бир саватли кўча баскетболи) спорт майдони қуриб берилади.

 

Қизлар мусобақасида ғолиб ва совриндор бўлган жамоалар пул мукофоти билан тақдирланади.