Ўзбекистонда Одил судлов академияси ташкил этилди
Янги академияда таълим жараёни “устоз-шогирд” анъанаси асосида, “бўлажак судяни судя ўқитади” тамойилига кўра олиб борилади.
2025-йил 21-август куни Ўзбекистон Республикаси Президенти “Одил судлов соҳасида юқори малакадаги кадрлар тайёрлаш тизимини тубдан такомиллаштириш чора-тадбирлари тўғрисида”ги PF-141-сон Фармонини имзолади. Фармонга кўра, аввалги Судьялар олий мактаби ислоҳ қилиниб, унинг ўрнида Ўзбекистон Республикаси Одил судлов академияси ташкил этилди.
Янги академияда таълим жараёни “устоз-шогирд” анъанаси асосида, “бўлажак судяни судя ўқитади” тамойилига кўра олиб борилади. 2025-йил 1-октябрдан бошлаб судяликка номзодлар учун олти ойлик касбий қайта тайёрлаш курслари йўлга қўйилади. Ушбу курслар давлат гранти асосида ташкил этилиб, тингловчиларга ўқиш даврида лавозими сақланган ҳолда судя ёрдамчиси ойлиги миқдорида стипендия тўланади.
Бундан ташқари, курсларга қабул қилиш уч босқичда — психологик ва тил бўйича тест синовлари, ёзма имтиҳон ва якка тартибдаги суҳбат орқали амалга оширилади. Курсларни муваффақиятли тамомлаган номзодлар эса бўш судялик лавозимлари учун танловларда қатнашиш ҳуқуқига эга бўлади.
Академияда малака оширишнинг янги тизими ҳам жорий этилади. Энди судялар иш тажрибасига қараб мунтазам малака ошириб боради: беш йилга тайинланган судялар — ҳар икки йилда икки ҳафта, ўн йилга тайинланганлар — ҳар уч йилда икки ҳафта, Олий суд судьялари ва раҳбар судялар — ҳар уч йилда бир ҳафта, фаолияти самарадорлиги паст бўлганлар эса қўшимча икки ҳафталик курсларда ўқитилади. 2026/2027 ўқув йилдан эса “Суд фаолияти” йўналишида амалий магистратура дастури ҳам йўлга қўйилиши режалаштирилган.
