Тошкентда ҳалок бўлган ЙПХ инспекторининг оиласи давлат муҳофазасига олинади

 

Тошкент шаҳар Ички ишлар бош бошқармаси Йўл-патруль хизмати инспектори, кичик сержант Ҳосилбек Эшназаровнинг вафоти юзасидан расмий баёнот эълон қилинди. Унда марҳум ходимнинг оила аъзолари давлат муҳофазасига олиниши маълум қилинди.

 

Ҳосилбек Эшназаров 2022 йилдан буён ички ишлар органларида хизмат қилиб келган. Дастлаб Яшнобод туманида фаолият бошлаган, 2024 йилдан патруль-пост хизматида ишлаган. 2025 йилдан эса Тошкент шаҳар Ички ишлар бош бошқармаси Йўл-патруль хизмати инспектори сифатида хизматга сафарбар этилган.

 

Хизмат фаолияти давомида у ҳуқуқбузарликларнинг олдини олиш, жамоат тартибини сақлаш ҳамда ҳаракат хавфсизлигини таъминлаш борасида фаол иштирок этган. Юзлаб йирик ва оммавий тадбирларда жамоат хавфсизлигини таъминлашда қатнашган.

 

Фаолияти давомида 1392 та ҳуқуқбузарликни аниқлаган бўлиб, шундан 324 таси қўпол қоидабузарликни ташкил этади. 14 нафар маст ҳайдовчининг ҳаракатига чек қўйган. Шунингдек, қарама-қарши йўналишда ҳаракатланиш, ҳужжатсиз транспорт воситасини бошқариш ҳамда светофорнинг тақиқловчи ишорасига бўйсунмаслик билан боғлиқ 52 та ҳолатни аниқлаб, қонуний чоралар кўрилишини таъминлаган.

 

Жорий йил 25 февраль куни тунги хизмат вақтида Миробод тумани Нукус кўчасида BWM русумли автомашинани олиб қочиб, юқори тезликда ҳаракатланган вояга етмаган шахс томонидан уриб юборилган. Оқибатда Ҳосилбек Эшназаров оғир тан жароҳатлари олиб, вафот этган. Марҳум 33 ёшда бўлиб, икки қиз ва бир ўғилнинг отаси эди.

 

Мазкур ҳолат юзасидан Ўзбекистон Республикаси Жиноят кодексининг 104-моддаси 3-қисми «д» банди ҳамда 267-моддаси 1-қисми билан жиноят иши қўзғатилиб, гумонланувчи процессуал тартибда қамоққа олинган. Тергов ҳаракатлари давом этмоқда.

 

Расмий баёнотда таъкидланишича, хизмат бурчини бажариш чоғида ҳалок бўлган ходимнинг оила аъзолари давлат томонидан ҳар томонлама қўллаб-қувватланади ва қонунчиликда белгиланган тартибда ижтимоий ҳимоя чоралари кўрилади.