Ўзбекистонда пораxўрлар учун муддатидан олдин озодлик бекор қилиниши мумкин
Янги қонун лойиҳасига кўра, зарар қопланмаса, пораxўрлар шартли равишда озод этилмайди.
Ўзбекистонда коррупцияга қарши курашни кучайтиришга қаратилган қонунчилик ташаббуслари доирасида пораxўрлик ва молиявий жиноятлар учун жавобгарликни қатъийлаштириш кўзда тутилмоқда.
Мазкур қонун лойиҳаси билан пора олиш, пора бериш, воситачилик қилиш, шунингдек, ўзлаштириш ёки расстрата йўли билан талон-торож қилиш ҳамда фирибгарлик жиноятлари учун ҳукм қилинган шахсларни, агар улар етказилган зарарни тўлиқ қопламаган бўлса, жазодан муддатидан илгари шартли равишда озод қилишни чеклаш таклиф этилмоқда.
Шунингдек, ушбу норма такроран ёки хавфли рецидивист томонидан, ёхуд жуда кўп миқдорда содир этилган коррупциявий жиноятлар учун ҳам татбиқ этилиши режалаштирилмоқда.
Қонун лойиҳасида коррупция ҳақида хабар берган шахсларни рағбатлантириш ва ҳимоя қилиш механизмларини кучайтириш ҳам назарда тутилган. Хусусан, бундай шахсларга нисбатан Коррупцияга қарши курашиш агентлигини олдиндан хабардор этмасдан туриб интизомий жазо чораларини қўллаш тақиқланиши белгиланмоқда.
Бундан ташқари, мансаб мавқеидан фойдаланиб содир этилган ўзлаштириш, расстрата ва фирибгарлик жиноятлари учун жавобгарлик чораларини янада оғирлаштириш кўзда тутилган.
Маълум қилинишича, қонун лойиҳаси депутатлар томонидан қабул қилиниб, кўриб чиқиш учун юқори палатага юборилган.
