Фарғонада эркак ер талашиб одамларга пичоқ билан таҳдид қилди
Болалар футбол майдонидаги ободонлаштириш ишлари вақтида ер масаласида келишмовчилик юзага келган.
Фарғона вилоятининг Қува туманида ер масаласи сабаб келишмовчилик юзага келиб, фуқаро пичоқ билан таҳдид қилгани маълум бўлди. Бу ҳақда вилоят Ички ишлар бошқармаси ахборот берди.
Қайд этилишича, жорий йилнинг 22 май куни Қува тумани “Султонобод” маҳалласида яшовчи фуқаро А.А. яшаш ҳудудидаги болалар футбол майдонида ободонлаштириш ишларини олиб бораётган маҳалладошлари Л.Ҳ. ҳамда Ҳ.А. билан ер майдони юзасидан тортишиб қолган.Маълум қилинишича, фуқаро ушбу ҳудудда ўзининг 8 метр ҳаққи борлигини билдириб, жанжал чиқарган ҳамда жамоат жойига совуқ қурол сифатида фойдаланилиши мумкин бўлган пичоқ олиб келган.
Фуқароларнинг мурожаатидан сўнг профилактика инспекторлари воқеа жойига зудлик билан етиб бориб, келишмовчиликни бартараф этган. Шунингдек, фуқаро қўлида бўлган пичоқ тегишли тартибда расмийлаштириб олинган. Ҳодиса давомида ҳеч ким тан жароҳати олмаган.
Ҳозирда мазкур ҳолат юзасидан фуқаро А.А.га нисбатан Маъмурий жавобгарлик тўғрисидаги кодекснинг 183-моддаси (майда безорилик) ҳамда 185-2-моддаси (совуқ қурол ёки совуқ қурол сифатида фойдаланилиши мумкин бўлган ашёларни олиб юриш) билан ҳужжатлар расмийлаштирилиб, суд органига юборилган.
