Навоийда пора олишдан бош тортган ЙПХ ходимига 1000 доллар мукофот берилди
Маст ҳолда автомобиль бошқарган ҳайдовчининг отаси ИИО ходимига маъмурий материалларни судга юбормаслик учун пора таклиф қилган.
Навоий вилоятида хизмат вазифасини ҳалол бажарган йўл-патруль хизмати ходими пул мукофоти билан рағбатлантирилди. Бу ҳақда Ички ишлар вазирлиги маълум қилди.
Қайд этилишича, 2026 йил 7 апрель куни Кармана туманида хизмат олиб бораётган ЙПХ ходимлари Самарқанд–Навоий йўналишида ҳаракатланаётган Lacetti автомобилини тўхтатиб, текширув ўтказган. Натижада ҳайдовчи транспорт воситасини маст ҳолда бошқараётгани аниқланган.
Шундан сўнг қоидабузарлик бўйича тегишли ҳужжатлар расмийлаштирилган ва автомобиль жарима майдончасига жойлаштирилган.
Маълум қилинишича, эртаси куни ҳайдовчи отаси билан ЙПХ ходимлари ҳузурига келган. Фуқаро маъмурий материалларни судга юбормаслик ҳамда автомобилни жарима майдончасидан чиқариб бериш эвазига инспекторга 1000 доллар пора таклиф қилган.
Ходим ушбу ҳолат ҳақида ички ишлар органларига хабар берган. Ўтказилган тезкор тадбир давомида фуқаро ЙПХ инспекторига таклиф қилинган порани беришга уринган вақтида қўлга олинган.
Ҳолат юзасидан Жиноят кодексининг 211-моддаси билан жиноят иши қўзғатилган. Ҳозирда тергов ҳаракатлари давом этмоқда.
Ички ишлар вазирлиги маълумотига кўра, пора олишдан бош тортган капитан Шербек Турхонов давлат томонидан базавий ҳисоблаш миқдорининг 30 баравари, яъни 12 миллион 360 минг сўм миқдоридаги пул мукофоти билан тақдирланган.
Аввалроқ Тошкент шаҳрида Фавқулодда вазиятлар вазирлиги ходимига 30 минг доллар пора таклиф қилган тадбиркор қамоққа олингани ҳақида хабар берилганди.
