Ҳиндистонда кучли ёмғир ва бўрон оқибатида камида 28 киши ҳалок бўлди

Ҳиндистоннинг Уттар-Прадеш, Биҳар, Ғарбий Бенгал ва Мадҳя-Прадеш штатларида кузатилган кучли ёмғир, момақалдироқ ва бўронлар оқибатида камида 28 киши ҳалок бўлди, ўнлаб одамлар жароҳат олди ва инфратузилмага зарар етди. Бу ҳақда Hindustan Times хабар берди.

 

Ҳиндистоннинг бир нечта ҳудудларида юз берган кескин об-ҳаво шароити кенг кўламли талафотларга сабаб бўлди. Энг кўп қурбонлар Уттар-Прадеш штатида қайд этилиб, бу ерда учта туманда камида 11 киши ҳаётдан кўз юмган.

 

Расмий маълумотларга кўра, Ҳамирпур туманида Бетва дарёси устида қурилаётган кўприкнинг бир қисми бўрон вақтида қулаб тушган. Ҳодиса оқибатида тўрт ишчи ва икки қўриқчи ҳалок бўлган. Қурилиш майдонида бўлган етти ишчидан учтаси қутқарув хизматлари томонидан тирик чиқарилган.

 

Уттар-Прадеш бош вазири Йоги Адитянат ҳалок бўлганлар оилаларига 500 минг рупий, жароҳатланганларга эса 50 минг рупий миқдорида ёрдам ажратилишини маълум қилди.

 

Каушамби туманида эса дарахт лойдан қурилган уй устига қулаб тушиши натижасида бир оиланинг уч аъзоси, жумладан икки бола ҳалок бўлган. Яна бир бола жароҳатланган. Ҳодиса маҳаллий вақт билан тахминан 04:00 да содир бўлган.

 

Жалаун туманида кучли шамол ва чақмоқ уриши оқибатида икки киши ҳалок бўлиб, камида етти киши жароҳат олган. Шунингдек, 23 бош чорва нобуд бўлгани, 45 та уй қисман зарар кўргани билдирилган.

 

Ғарбий Бенгал штатида ҳам кучли ёмғир ва бўронлар оқибатида камида етти киши ҳалок бўлган. Ҳиндистон Метеорология департаменти огоҳлантириш беришидан аввалроқ ҳам кўплаб ҳудудларда талафотлар қайд этилган.

 

Биҳар штатида ҳам ноқулай об-ҳаво шароити қурбонлар ва жароҳатланганларга сабаб бўлган бўлиб, камида етти киши ҳаётдан кўз юмган.

 

Расмийлар зарар кўламини аниқлаш ва қутқарув ишларини давом эттирмоқда.