Ўзбекистон Ҳиндистон билан ЖСТга қўшилиш бўйича музокараларни якунлади
Томонлар ўртасида бозорга кириш масалалари бўйича протокол имзоланди.
Ўзбекистон Ҳиндистон билан Жаҳон савдо ташкилоти (ЖСТ)га қўшилиш бўйича икки томонлама музокараларни муваффақиятли якунлади. Бу ҳақда Президентнинг ЖСТ масалалари бўйича махсус вакили Азизбек Урунов маълум қилди.
Қайд этилишича, томонлар бозорга кириш масалалари бўйича музокараларни якунловчи протоколни имзолаган. Мазкур келишув аслида 2024 йилда эришилган бўлиб, кейинги даврда ҳужжат матни ва техник тафсилотларни якуний келишиш ишлари олиб борилган.
Азизбек Уруновнинг таъкидлашича, Ҳиндистон музокаралар давомида бозорга кириш масалаларида конструктив ёндашув намойиш этган.
Шунингдек, у Ҳиндистон томонига Ўзбекистоннинг ЖСТга қўшилиш жараёнини қўллаб-қувватлагани учун миннатдорлик билдирган.
Маълум қилинишича, Ўзбекистон делегацияси яқин кунларда имзоланган протоколнинг асл нусхасини ЖСТ Котибиятига топширади. Ҳужжат ташкилотнинг расмий материаллари тўпламига киритилади.
