Андижонда тақиқланган модда мавжуд оздирувчи қаҳвалар савдосига чек қўйилди
Жами 11 килограмм “Кеtо Coffee Mix” маҳсулоти таркибида кучли таъсир қилувчи “сибутрамин” моддаси бўлган.
Андижон вилоятида таркибида тақиқланган моддалар бўлган оздирувчи кофелар аниқланди. Бу ҳақда ДХХ хабар берди.
Маълум қилинишича, Марҳамат тумани марказидаги савдо мажмуасида 1991 йилда туғилган фуқаро шартли харидорга 900 дона “Кеto Coffee Mix” маҳсулотини 6 миллион сўмга сотаётган вақтида ашёвий далиллар билан ушланди.
Мазкур маҳсулотлар Андижон шаҳридаги “Жаҳон савдо комплекси” ҳудудида жойлашган дўкондан харид қилингани аниқланган. Шундан сўнг тезкор тадбир давом эттирилиб, Андижон шаҳрида яшовчи 1987 йилда туғилган фуқарога тегишли савдо нуқтасида текширув ўтказилди.
Натижада ушбу дўкондан жами 480 дона “Кето Coffee Mix” маҳсулоти мусодара қилинди.
Мутахассислар хулосасига кўра, ашёвий далил сифатида олинган жами 11 килограмм “Кеto Coffee Mix” маҳсулоти таркибида кучли таъсир қилувчи “сибутрамин” моддаси мавжуд бўлиб, унинг Ўзбекистон ҳудудидаги муомаласи тақиқланган.
Мазкур ҳолат юзасидан жиноий иш қўзғатилиб, тергов ҳаракатлари олиб борилмоқда.
