Қозоғистонда “олтин виза” тизими жорий этилади

 

Қозоғистон президенти Қосим-Жомарт Тоқаев мамлакат миграция сиёсатини такомиллаштиришга қаратилган фармонни имзолади. Ҳужжатга кўра, иқтидорли мутахассислар ва инвесторларни жалб қилиш ҳамда уларнинг мамлакатда фаолият юритишини соддалаштириш кўзда тутилган.

 

Мазкур ислоҳот доирасида “Altyn Visa” — яъни “олтин виза” тизимини жорий этиш режалаштирилмоқда. Ушбу виза эгаларига давлат хизматларидан фойдаланишда Қозоғистон фуқаролари билан тенглаштирилган мақом берилади. Шунингдек, улар учун солиқ имтиёзлари жорий этилиб, шахсий даромад солиғи, мол-мулк ва ер солиғи ҳамда умумий даромад декларацияси топшириш мажбурияти бекор қилинади.

 

Фармонга мувофиқ, инвесторлар ва топ-менежерлар учун бизнес визалари, олимлар, шифокорлар, маданият арбоблари ҳамда етакчи хорижий университетлар битирувчилари учун махсус ишчи визалар жорий этилади. Бундан ташқари, инвестиция лойиҳаларида иштирок этувчи шахслар учун алоҳида вақтинчалик ишчи визалар ҳам назарда тутилган.

 

Ҳужжатда хорижий дипломларни нострификациясиз тан олиш, яъни уларни автоматик равишда эътироф этиш тизимини йўлга қўйиш ҳам белгиланган. Шу билан бирга, чет элликлар учун “ягона ойна” тамойили асосида ариза топшириш имконини берувчи рақамли платформалар яратилади.

 

Остона ва Олмаота шаҳарларида хорижий фуқаролар учун инглиз тилида хизмат кўрсатиш зоналарини ташкил этиш, шунингдек, инновацион йўналишларда, жумладан сунъий интеллект соҳасида янги платформаларни ишга тушириш режалаштирилган.

 

Фармонга кўра, Остона халқаро молия маркази фаолиятига ҳам ўзгартиришлар киритилади. Хусусан, солиқ резидентлигини олиш учун мамлакатда бўлиш муддати 90 кундан 30 кунгача қисқартирилади.

 

Мазкур чоралар Қозоғистонни инвестициялар ва юқори малакали кадрларни жалб қилиш бўйича минтақавий марказга айлантиришга қаратилган.