Президент ўзбекистонлик аскарни ўз уйида яширган британиялик эр-хотинни “Дўстлик” ордени билан мукофотлади
Ле Бретонлар уруш йилларида фашистлар концлагеридан қочиб чиққан ўзбекистонлик аскарнинг ҳаётини сақлаб қолган.
Шавкат Мирзиёев томонидан имзоланган фармонга мувофиқ, Буюк Британия фуқаролари – марҳум Жон ва Филлис Эмили Ле Бретонлар Ўзбекистон Республикасининг «Дўстлик» ордени билан мукофотланди.
Мазкур юксак мукофот уларга Иккинчи жаҳон уруши даврида намоён этилган жасорат ва инсонпарварлик учун берилди. Қайд этилишича, улар ўта мураккаб ва хавфли шароитда Жерси оролидаги фашистлар концлагеридан қочиб чиққан ўзбекистонлик аскар Боқижон Акрамовни ўз уйларида яшириш орқали унинг ҳаётини сақлаб қолган.
Уларнинг ушбу фидокорона ҳаракати инсонийлик, меҳр-оқибат ва жасоратнинг ёрқин намунаси сифатида эътироф этилди. Шунингдек, мазкур қаҳрамонлик дунё халқлари ўртасида тинчлик, дўстлик ва биродарлик ғояларини мустаҳкамлашга хизмат қилгани алоҳида таъкидланди.
