Ўзбекистонда кўмир, нефть ва газ қазиб олиш камайди
Бироқ бензин, электр энергияси, дизель ёнилғиси ва портландсемент ишлаб чиқаришида ўсиш қайд этилди.
2026 йилнинг январь–март ойларида Ўзбекистонда асосий энергия ресурсларини қазиб олиш ҳажми камайди. Бу ҳақда Статқўм маълум қилди.
Маълумотларга кўра, I чоракда табиий газ қазиб чиқариш 9,6 млрд куб метрни ташкил этиб, ўтган йилнинг шу даврига нисбатан 15 фоизга камайган.
Нефть қазиб олиш ҳажми 157,3 минг тоннани ташкил этиб, 2025 йилнинг биринчи чорагига нисбатан 2,2 фоизга пасайган. Газ конденсати ишлаб чиқариш эса 18,3 фоизга қисқариб, 242,3 минг тоннага тушган.
2024 йил билан солиштирганда, табиий газ қазиб олиш 17,2 фоизга, нефть 12,2 фоизга, газ конденсати эса 26 фоизга камайган.
Шу билан бирга, айрим маҳсулотлар ишлаб чиқаришида ўтган йилгидан ўсиш кузатилди. Жумладан, автомобиль бензини ишлаб чиқариш 2,9 фоизга ошиб, 313,2 минг тоннага етган. Бироқ бу кўрсаткич 2024 йил даражасидан ҳали ҳам 13,1 фоизга пастлигича қолмоқда.
Кўмир қазиб олиш ҳажми 1,1 млн тоннагача камайиб, ўтган йилги 1,2 млн тонна кўрсаткичга нисбатан 8,3 фоизга қисқарган. Шу билан бирга, мазкур кўрсаткич 2024 йилнинг шу даврида қайд этилган 1 млн тоннадан юқори бўлиб қолмоқда.
Саноатнинг айрим йўналишларида эса ижобий ўсиш қайд этилди. Хусусан, портландсемент ишлаб чиқариш 13,9 фоизга ошиб, 4,1 млн тоннага етган. Дизель ёнилғиси ишлаб чиқариш эса 54,3 фоизга кўпайиб, 280,9 минг тоннага етди.
Электр энергияси ишлаб чиқариш ҳам ўсишни намоён этиб, 4,7 фоизга ошиб 22,93 млрд кВт/соатни ташкил этган.
