Ўзбекистонда экологик қонунбузарликлар учун молиявий жавобгарлик кучайтирилади
Сувни ифлослантириш ва дарахтларни ҳимоя қилмаслик ҳолатларида катта миқдорда молиявий санкциялар қўлланилади.
Ўзбекистонда экология, атроф-муҳитни муҳофаза қилиш ва табиий ресурслардан фойдаланиш соҳасидаги қонунбузарликлар учун жавобгарлик кучайтирилмоқда. Бу борада Жорий йил 4 майда қабул қилинган ЎРҚ–1143-сонли Қонун билан тегишли қонунчилик ҳужжатларига ўзгартириш ва қўшимчалар киритилди. Бу ҳақда Адлия вазирлиги хабар берди.
Янги тартибларга кўра, экологик, атроф-муҳитни муҳофаза қилиш ва табиатдан фойдаланиш соҳасидаги ҳуқуқбузарликлар учун молиявий санкциялар жорий этилади.
Хусусан, дарё ўзанларини тозалаш ва қирғоқларини мустаҳкамлаш бўйича белгиланган тартибларни бузганлик учун юридик шахсларга атроф-муҳитга етказилган зарарнинг 3 баравари миқдорида жарима қўлланади.
Сувларни ифлослантириш, шунингдек, сув объектларига оқова сувларни ташлаш талаблари бузилганда, компенсация тўловининг 10 баравари миқдорида молиявий санкция белгиланади.
Юридик шахслар тасарруфидаги ҳудудларда дарахтларни муҳофаза қилиш ва сақлаш чораларини кўрмаганлик учун етказилган зарарнинг 5 баравари миқдорида жарима ундирилади.
Қонун расмий эълон қилинган кундан эътиборан 3 ой ўтгач кучга киради.
