Ўзбекистонда ер ости тоннеллари қуриш учун жиноий жавобгарлик жорий этилади
2016–2025 йиллар давомида 12 та ноқонуний чегарадан ўтувчи туннел аниқланган.
Ўзбекистонда давлат чегараси хавфсизлигини мустаҳкамлаш ҳамда ноқонуний фаолиятларнинг олдини олиш мақсадида ер ости туннеллари билан боғлиқ жиноятлар учун жавобгарликни кучайтириш режалаштирилмоқда.
Маълум қилинишича, сўнгги йилларда давлат чегараси орқали яширин туннеллар қазиш орқали товар ва бошқа моддий бойликларни ноқонуний олиб ўтиш ҳолатлари ортиб бормоқда. Хусусан, 2016–2025 йиллар давомида 12 та шундай туннел аниқланган. Фарғона ва Андижон вилоятларида туннеллар орқали 30 миллиард сўмдан ортиқ маҳсулотлар ноқонуний равишда олиб кирилгани қайд этилган.
Шу муносабат билан Олий Мажлис Қонунчилик палатасида “Ўзбекистон Республикасининг Жиноят ва Жиноят-процессуал кодексларига ўзгартириш ва қўшимчалар киритиш тўғрисида”ги қонун лойиҳаси кўриб чиқилди.
Лойиҳага кўра, давлат чегараси орқали ер ости туннеллари ёки ноқонуний инфратузилмадан фойдаланган ҳолда божхона қонунчилигини бузиш оғирлаштирувчи ҳолат сифатида белгиланмоқда. Шунингдек, бундай туннеллар орқали ноқонуний кириш-чиқиш ёки чегарани кесиб ўтиш учун ҳам жавобгарлик кучайтирилади.
Бундан ташқари, ноқонуний туннелларни қуриш, улардан фойдаланиш ёки ушбу фаолиятни молиялаштириш учун алоҳида жиноий жавобгарлик жорий этилиши таклиф этилмоқда.
Қонун лойиҳасида яна бир муҳим норма сифатида, агар шахслар ихтиёрий равишда ноқонуний туннеллар ҳақида хабар берса ёки жиноятни фош этишга кўмаклашса, уларни жиноий жавобгарликдан озод этиш назарда тутилган.
Депутатлар ушбу ташаббус давлат чегарасини янада мустаҳкамлаш, ноқонуний фаолиятларга барҳам бериш ва мамлакатда хавфсизликни таъминлашда муҳим аҳамиятга эга эканини таъкидлаб, қонун лойиҳасини маъқулладилар.
