“Туркия аввалги Туркия эмас”: Эрдўған Европа Иттифоқини огоҳлантирди

Туркия Президенти Ражаб Тоййиб Эрдўған Европа Иттифоқини Анқарага нисбатан риторика ва сиёсий ёндашувни қайта кўриб чиқишга чақирди. Бу ҳақда у Вазирлар Маҳкамаси йиғилишидан сўнг халққа қилган мурожаатида маълум қилди, дея хабар бермоқда Anadolu агентлиги.

 

Эрдўғаннинг таъкидлашича, Европа Иттифоқи Туркиянинг “конструктив позицияси”га путур етказадиган баёнот ва ҳаракатлардан тийилиши лозим. Унинг фикрича, Брюссел Анқаранинг ижобий ёндашувини қўллаб-қувватлаши керак.

 

“Унутмаслик керакки, Туркия энди аввалги Туркия эмас, дунё ҳам энди Ғарб давлатларининг таъсир доираси билан чекланиб қолмаган”, деди Президент.

 

Эрдўған Европа Иттифоқи Туркиясиз глобал куч марказига айлана олмаслигини таъкидлаб, блокнинг айрим институтларида “стратегик кўрлик” ҳануз мавжудлигини билдирди. Унинг сўзларига кўра, масала Туркиянинг позициясида эмас, балки Брюсселнинг келажакда ўзини қандай кўришида.

 

Туркия раҳбари Европа Иттифоқига аъзолик жараёни 1959 йилдан бери давом этаётганини эслатиб, Анқара бу йўлда кўплаб адолатсиз ёндашувларга дуч келганини қайд этди. Шунга қарамай, Туркия тўлиқ аъзолик мақсадидан воз кечмаганини билдирди.

 

Эрдўған, шунингдек, 2015 йилдан бошлаб Туркия–Европа Иттифоқи муносабатларида бироз ижобий динамика кузатилганини, бироқ 2016 йилдаги давлат тўнтаришига уринишдан сўнг бу жараён секинлашганини айтди.

 

Унинг сўзларига кўра, дунё кўп қутбли тизимга ўтмоқда ва Туркия ушбу янги глобал тузилмада етакчи марказлардан бирига айланиш салоҳиятига эга.

 

Президент Европа Иттифоқини танлов олдида турганини таъкидлаб, у Туркияни имконият сифатида кўрадими ёки четлаштирувчи ёндашувни давом эттирадими — бу Европанинг келажагини белгилашини билдирди.

 

Эрдўған Европадаги қарор қабул қилувчиларни тарихий ва сиёсий стереотиплардан воз кечиб, Туркия билан тенг ва самимий муносабатлар ўрнатишга чақирди.