41 нафар ўзбекистонлик Туркманистон орқали Эрондан қайтарилди
Ўзбекистоннинг Ашхобод ва Теҳрондаги дипломатик ваколатхоналари Туркманистоннинг тегишли идоралари фуқароларнинг қайтарилиш масаласини ҳал қилган.
Ўзбекистон Ташқи ишлар вазирлиги кўмагида бир гуруҳ ватандошлар Эрондан Туркманистон ҳудуди орқали транзит тарзда Ўзбекистонга қайтарилди, дея хабар бермоқда “Дунё” АА.
Маълум қилинишича, Ўзбекистоннинг Ашхобод ва Теҳрондаги дипломатик ваколатхоналари Туркманистоннинг тегишли идоралари билан ҳамкорликда фуқароларнинг қайтиши билан боғлиқ виза ва транспорт-логистика масалаларини ҳал қилган.
Туркманистон томонининг кўмаги билан жами 41 нафар Ўзбекистон фуқароси “Сарахс–Серахс” ҳамда “Гаудан–Бажгиран” чегара ўтказиш пунктларида кутиб олиниб, дипломатик ходимлар назорати остида уларнинг хавфсиз тарзда Ўзбекистонга етиб келиши таъминланган.
Дипломатик ваколатхоналар томонидан билдирилишича, ҳеч бир фуқаро эътибордан четда қолмайди. Ўзбекистонликларни ўз оилалари бағрига қайтариш ишлари инсон манфаатлари устуворлиги тамойили асосида изчил давом эттирилади.
