Нақдсиз ҳисоб-китобларга ўтиш уй жой ижара нархларига қандай таъсир қилди?

Тошкент шаҳрида уй-жой ижара бозорида нархлар нақдсиз ҳисоб-китобларга ўтиш ортидан кескин ўзгармаган. Бу ҳақда Макроиқтисодий ва ҳудудий тадқиқотлар институти томонидан ўтказилган таҳлилда маълум қилинди.

 

Институт OLX платформасида жойлаштирилган 1,7 миллиондан ортиқ эълонлар асосида 2026 йил апрель ойидаги бозор ҳолатини ўрганган. Қайд этилишича, 1 апрелдан уй-жой олди-сотдисида ҳисоб-китобларнинг нақдсиз шаклга ўтказилиши ижара нархларида дарҳол ўсишга олиб келмаган.

 

Маълумотларга кўра, 2026 йил март ва апрель ойларида умумий медиан ижара нархи бир хил — 550 доллар даражасида сақланиб қолган. Шунингдек, эълонлар сонида ҳам сезиларли ўзгариш кузатилмаган: январь–март ойларида ўртача 22,6 минг эълон жойлаштирилган бўлса, апрель ойида бу кўрсаткич 22,8 мингтани ташкил этган.

 

Шу билан бирга, бозор сегментлар кесимида турлича динамикани намоён этмоқда. Хусусан, бир хонали уйлар нархи йилига 14,3 фоизга, икки хонали уйлар эса 10 фоизга ошган. Аксинча, уч хонали уйлар нархи 12,5 фоизга, тўрт ва ундан ортиқ хонали уйлар эса 26,1 фоизга арзонлашган.

 

Ҳудудлар кесимида энг юқори ижара нархлари Миробод (800 доллар), Шайхонтоҳур (750 доллар) ва Яккасарой (700 доллар) туманларида қайд этилган. Нисбатан арзон ҳудудлар сифатида Бектемир (390 доллар), Сергели ва Учтепа (ҳар бири 400 доллар) кўрсатилган.

 

Шунингдек, айрим ҳудудларда ўсиш кузатилган: Олмазор туманида нархлар 12,5 фоизга, Мирзо Улуғбек туманида эса 9,1 фоизга ошган. Бироқ “премиум” ҳудудларда нархлар пасайган — Шайхонтоҳурда 25 фоизга, Мирободда 11,1 фоизга, Яккасаройда 6,7 фоизга.

 

Таҳлил муаллифларига кўра, ижара бозори умумий кўрсаткичлар бўйича барқарор қолаётган бўлса-да, талаб асосан арзонроқ ва кичик — 1-2 хонали уйлар сегментига силжимоқда.

 

Мутахассислар якуний хулоса чиқариш учун 2026 йилнинг кейинги чоракларидаги бозор тенденцияларини кузатиш муҳимлигини таъкидлаган.