Тошкентда ўқитувчи 9-синф ўқувчисини калтаклади
Ҳолат юзасидан ҳуқуқ-тартибот органлари вакилларидан иборат ишчи гуруҳ томонидан ўрганиш ишлари олиб борилмоқда.
Ижтимоий тармоқларда ўқитувчи ва ўқувчилар жанжаллашгани акс этган видео тарқалди.
Мазкур ҳодиса юзасидан Тошкент шаҳар Мактабгача ва мактаб таълими бошқармаси расмий муносабат билдирди.
Маълум қилинишича, воқеа Тошкент шаҳри Мирзо Улуғбек туманидаги 275-сонли умумтаълим мактабида содир бўлган. Дарс жараёнида информатика фани ўқитувчиси ҳамда 9-синф ўқувчилари ўртасида низо келиб чиққан.
Мазкур ҳолат юзасидан Тошкент шаҳар мактабгача ва мактаб таълими бошқармаси ҳамда ҳуқуқ-тартибот органлари вакилларидан иборат ишчи гуруҳ томонидан ўрганиш ишлари олиб борилмоқда.
Қайд этилишича, ҳолатга алоқадор ва жавобгар деб топилган барча шахсларга нисбатан амалдаги қонунчилик доирасида тегишли чоралар кўрилади.
Ўрганиш якунлари бўйича қўшимча маълумот тақдим этилиши билдирилган.
