Андижон вилоятида бедарак йўқолган ўсмирнинг жасади Қорадарёдан топилди
У дўстлари билан дарёга чўмилиш учун бориб, сувга чўкиб кетган.
Андижон вилоятининг Балиқчи туманида бедарак йўқолган 2009 йилда туғилган вояга етмаган ўсмирнинг жасади Қорадарёдан топилди. Бу ҳақда вилоят прокуратураси хабар берди.
Маълум қилинишича, 17 май куни фуқаро Қ.М вилоят ИИБга мурожаат қилиб, ўзининг вояга етмаган фарзанди 16 май куни уйидан чиқиб кетгани ва қайтиб келмагани ҳақида хабар берган ҳамда уни қидиришда ёрдам сўраган.
Ушбу мурожаат асосида Балиқчи туман прокуратураси томонидан терговга қадар текширув ҳаракатлари бошланган.
Дастлабки маълумотларга кўра, 16 май куни соат 15:30 лар атрофида М.М. дўстлари билан бирга туман ҳудудидан оқиб ўтувчи Қора-дарёга чўмилиш учун борган ва шу вақтда сувга чўкиб кетган.
Қидирув ишлари давомида ўсмирнинг жасади 20 май куни Андижон–Наманган йўналишини боғловчи Қорадарё кўприги яқинидан топилган.
Ҳозирда ҳолат юзасидан терговга қадар текширув ишлари давом этмоқда.
Қайд этилишича, текширув ҳаракатларини бориши вилоят прокуратураси томонидан назоратга олинган бўлиб, якунига кўра қонуний қарор қабул қилиниши таъминланади.
“Ҳурматли ота-оналар фарзандларингизни қаровсиз қолдирманг, айниқса ёз ойларида рухсат этилмаган сув ҳавзаларида чўмилишига йўл қўйманг, фарзандларингизни назоратсиз қўйманг!”, дейилади хабарда.
Аввалроқ Сурхондарёда 13 ёшли қиз Тўпаланг дарёсига чўкиб кетгани ҳақида хабар берилганди.
