Расман Қурбон ҳайити қачон нишонланиши маълум қилинди

 

Ўзбекистон Президенти Шавкат Мирзиёев “Муборак Қурбон ҳайитини нишонлаш тўғрисида”ги қарорни имзолади.

Қарорга мувофиқ, Ўзбекистон мусулмонлари идорасининг 2026 йилда Қурбон ҳайитининг биринчи куни 27 май — чоршанба кунига тўғри келиши ҳақидаги ахбороти маълумот учун қабул қилинди ҳамда ушбу сана мамлакатимизда Қурбон ҳайити байрами сифатида кенг нишонланиши белгиланди.

Ҳужжатда қайд этилишича, Қурбон ҳайити инсонпарварлик, саховат, бағрикенглик, меҳр-оқибат ва шукроналик каби эзгу қадриятларни мустаҳкамлашда муҳим аҳамият касб этади. Айниқса, ёрдамга муҳтож инсонларни қўллаб-қувватлаш, жамиятда ҳамжиҳатлик ва ижтимоий бирдамликни кучайтиришда ушбу муборак айёмнинг ўрни алоҳида экани таъкидланган.

Шунингдек, Меҳнат кодексига мувофиқ Қурбон ҳайитининг биринчи куни ишланмайдиган байрам куни ҳисобланади. Президентнинг аввалги фармонига асосан 2026 йил 28 ва 29 май кунлари барча ходимлар учун қўшимча дам олиш кунлари этиб белгиланган. Олти кунлик иш ҳафтасида ишловчилар учун эса 30 май — шанба куни ҳам дам олиш куни бўлади.

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларига Қурбон ҳайитини миллий анъана ва урф-одатларга уйғун ҳолда, кўтаринки руҳда ташкил этиш юзасидан тегишли чора-тадбирларни амалга ошириш топширилди.

Бундан ташқари, Туризм қўмитаси ва Транспорт вазирлигига ҳайит кунларида зиёратгоҳлар ва тарихий қадамжоларга ташриф буюриш учун аҳолига қулай шароит яратиш вазифаси юклатилди.

Қарор ижроси Бош вазир Абдулла Арипов ҳамда Президент маслаҳатчиси Сухроб Умурзаков зиммасига юклатилган.