Болалар омбудсмани трансформаторлар бўйича хавфсизлик назоратини кучайтиришни талаб қилди

Наманганда трансформатор устига чиққан 13 ёшли бола ток уриши оқибатида вафот этди. Ҳодиса ортидан Болалар омбудсмани электр объектларида хавфсизлик назоратини кучайтиришни талаб қилди.

 

Фожиа 5 май куни Наманган вилоятининг Давлатобод туманида юз берган. 2013 йилда туғилган бола гилос узиш мақсадида юқори кучланишли трансформатор устига чиққан вақтида электр токи таъсирига тушган. У оғир тан жароҳати олиб, кейинчалик шифохонада вафот этган.

 

Марҳумнинг яқинлари ҳодиса содир бўлган ҳудудда хавфсизлик чоралари етарли даражада таъминланмаганини айтмоқда. Уларнинг таъкидлашича, трансформатор атрофи панжара билан ўралмаган, айрим электр симлари очиқ қолган ҳамда объект қулфланмаган бўлган.

 

Воқеадан сўнг Болалар омбудсмани расмий муносабат билдириб, юқори кучланишли электр қурилмаларидан фойдаланишда болалар хавфсизлигини таъминлаш мутасадди ташкилотларнинг бевосита мажбурияти эканини таъкидлади.

 

Шунингдек, омбудсман республика бўйлаб шу каби ҳолатларнинг олдини олиш мақсадида ваколатли идораларга хавфсизлик стандартлари ижроси устидан назоратни кучайтириш юзасидан тегишли таъсир чораси киритилганини маълум қилди.

 

Ҳозирда ҳолат юзасидан Давлатобод туман прокуратураси томонидан терговга қадар текширув олиб борилмоқда. Туман электр таъминоти корхонаси ходимлари фаолияти юзасидан эса хизмат текшируви тайинланган.