Тошкент вилоятида 20 минг долларлик ноқонуний ер савдоси тўхтатилди
Маҳалла раиси, кадастр муҳандиси ва яна бир фуқаро 10 сотих ерни сотмоқчи бўлган.
Тошкент вилоятининг Паркент туманида давлат захирасидаги ер майдонини ноқонуний сотишга уринган шахслар қўлга олинди. Бу ҳақда ДХХ Zamon.uz'гa хабар берди.
Маълум қилинишича, тумандаги маҳалла фуқаролар йиғиниларидан бирининг раиси ҳамда 1970 йилда туғилган фуқаро давлат захирасида бўлган 10 сотих ер майдонини харидорга 20 минг АҚШ долларига сотишга келишган.
Улар ер ҳужжатларини расмийлаштириб бериш учун Давлат кадастрлари палатасининг туман филиали муҳандисига 2–3 минг доллар беришни режалаштирган.
Давлат хавфсизлик хизмати ходимлари томонидан Иқтисодий жиноятларга қарши курашиш департаменти ҳамда ички ишлар органлари билан ҳамкорликда ўтказилган тезкор тадбир давомида маҳалла раиси, кадастр муҳандиси ва 1970 йилда туғилган фуқаро 17 минг АҚШ доллари ҳамда 37 миллион сўм олаётган вақтида ушланган.
Ҳолат юзасидан мазкур шахсларга нисбатан жиноят иши қўзғатилиб, тергов ҳаракатлари олиб борилмоқда.
