Шавкат Мирзиёев Покистон президенти ва бош вазирига таъзия билдирди
Балужистондаги портлаш оқибатида 23 киши ҳалок бўлган, 70 киши жароҳатланган эди.
Шавкат Мирзиёев Покистоннинг Балужистон провинциясида содир этилган террорчилик ҳаракати оқибатида кўплаб инсонлар ҳалок бўлгани муносабати билан Покистон Президенти Асиф Али Зардорий ҳамда Бош вазир Шаҳбоз Шарифга таъзия йўллади.
Президент матбуот хизмати маълумотига кўра, давлат раҳбари ҳалок бўлганларнинг оила аъзолари ва яқинларига чуқур ҳамдардлик билдириб, жароҳатланганларнинг тез фурсатда соғайиб кетишини тилаган.
Эслатиб ўтамиз, 24 май куни Покистоннинг Балужистон провинциясидаги темирйўл яқинида портлаш содир бўлган эди. Ҳодиса оқибатида 23 киши ҳалок бўлган, яна 70 киши турли даражадаги тан жароҳатлари олган.
Маълумотларга кўра, портлаш оқибатида поездлардан бирига қисман шикаст етган, шунингдек, яқин ҳудудда тўхтаб турган автомобиллар ҳам зарар кўрган. Кучли портлаш тўлқини сабаб атрофдаги биноларнинг ойналари цинган.
Темирйўл маъмурияти хавфсизлик нуқтайи назаридан Пешавор шаҳрига йўл олган “Jaffar Express” поезди Кветта бекатида вақтинча тўхтатилганини маълум қилган.
