Бугун барча ходимлар ишдан 1 соат олдин кетиш ҳуқуқига эга
Меҳнат кодексига кўра, байрам арафасида иш куни камида 1 соатга қисқартирилади.
Меҳнат кодексининг 187-моддасига мувофиқ, ишланмайдиган байрам кунлари арафасида ҳар кунлик иш вақти барча ходимлар учун камида бир соатга қисқартирилади.
Шу муносабат билан, эртага — 27 май куни Қурбон ҳайитининг биринчи куни нишонланиши ҳамда ушбу сана дам олиш куни ҳисобланиши сабабли, бугун ишга чиққан ходимлар иш фаолиятини бир соат олдин якунлаш ҳуқуқига эга.
Қонунчиликка кўра, байрамолди куни иш вақтини қисқартириш имконияти мавжуд бўлмаган узлуксиз фаолият юритувчи ташкилотлар ва айрим турдаги ишларда ортиқча ишланган вақт ходимга қўшимча дам бериш ёки унинг розилиги асосида иш вақтидан ташқари меҳнат учун белгиланган тартибда ҳақ тўлаш орқали компенсация қилинади.
Қурбон ҳайити муносабати билан дам олиш кунлари қуйидагича белгиланган:
— 27 май, чоршанба — Қурбон ҳайити;
— 28 май, пайшанба — қўшимча дам олиш куни;
— 29 май, жума — қўшимча дам олиш куни;
— 30 май, шанба — ҳафтасига 6 кун ишловчилар учун қўшимча дам олиш куни;
— 31 май, якшанба — одатий дам олиш куни.
Шу тариқа, фуқаролар учун кетма-кет бир неча кунлик дам олиш имконияти яратилади.
