B1 сертификатига эга абитуриентларга чет тили фанидан максимал баллнинг 75 фоизи берилади
Янги тартибга кўра, бир қатор сертификатларга эга педагоглар учун устамалар белгиланди.
Адлия вазирлиги томонидан Хорижий тиллар ва умумтаълим фанларини билиш даражасини белгиловчи сертификатлар рўйхатига ўзгартириш ва қўшимчалар киритилди. Бу ҳақда “Ҳуқуқий ахборот” Тelegram-канали хабар берди.
Янги тартибга кўра, бакалавриатнинг фанлар мажмуасида чет тили фани мавжуд бўлган таълим йўналишларига киришда B1 даражадаги миллий ёки халқаро тан олинган сертификатга эга абитуриентларга ушбу фан бўйича белгиланган максимал баллнинг 75 фоизи миқдорида балл берилади.
Шунингдек, инглиз тилидан бериладиган TOEFL iBT сертификатининг мувофиқлик даражаси эндиликда 1–6 баллик тизим асосида белгиланади.
Ҳужжатга мувофиқ, педагог ходимларга устама тўлашда инглиз тилидан бериладиган ТКТ, ТЕSOL, TEFL ва TESL сертификатларининг амал қилиш муддати ҳисобга олинади.
Бундан ташқари, касбий таълим ташкилотлари педагогларига хорижий тилда махсус фанларни ўқитгани учун B2 даражадаги миллий ёки халқаро тан олинган сертификатга эга бўлса, лавозим маошининг 50 фоизи, C1 даражасидаги сертификат учун эса 100 фоизи миқдорида ҳар ойлик устама тўланади.
Янги тартибга кўра, ўқитувчиларга Digital SAT сертификатининг математика бўлимидан 750 ва ундан юқори балл олган тақдирда ҳам устама белгиланади.
Шунингдек, умумий ўрта таълим мактабларида фаолият юритаётган мусиқа маданияти ва жисмоний тарбия фани ўқитувчиларига Б+ ва ундан юқори даражадаги сертификатлар учун устама берилиши назарда тутилган.
