“Келажак учун хорижий тил” лойиҳаси доирасида 10 мингдан ортиқ ўқувчи миллий сертификат олди
40 мингга яқин 11-синф ўқувчисининг хорижий тил бўйича билим ва кўникмалари оширилди.
Тошкент шаҳрида амалга оширилаётган “Келажак учун хорижий тил” лойиҳаси доирасида 10 минг нафардан ортиқ 11-синф ўқувчиси инглиз тили бўйича B1 ва ундан юқори даражадаги миллий сертификатни қўлга киритди. Бу ҳақда Мактабгача ва мактаб таълими вазири Эъзоза Каримова маълум қилди.
Қайд этилишича, лойиҳа 2025 йил декабрь ойидан бошлаб пойтахтдаги барча умумтаълим мактабларида йўлга қўйилган. “Тошкент тажрибаси” сифатида амалга оширилган лойиҳа доирасида 40 мингга яқин 11-синф ўқувчисининг хорижий тил бўйича билим ва кўникмалари оширилган.
Дастлаб ўқувчиларнинг тил билиш даражасини аниқлаш мақсадида МОCК имтиҳонлари ўтказилган. Натижаларга кўра, улар билим даражасига қараб гуруҳларга ажратилиб, хорижий мутахассислар иштирокида бепул машғулотлар ташкил этилган.
Шунингдек, Билим ва малакаларни баҳолаш агентлиги билан ҳамкорликда ўқувчилар хорижий тилларни билиш даражасини аниқлаш бўйича миллий сертификат синовларидан ўтказилган. Натижада Тошкент шаҳридаги 10 106 нафар 11-синф ўқувчиси инглиз тили бўйича B1 ва ундан юқори даражадаги миллий сертификатни қўлга киритган.
Вазирнинг таъкидлашича, 2025 йил декабрь ойида хорижий тил сертификатига эга ўқувчилар сони 2 970 нафарни ташкил этган бўлса, 2026 йил 1 июль ҳолатига кўра бу кўрсаткич 17 515 нафарга етган.
Бундан ташқари, 2025–2026-ўқув йили давомида республика бўйлаб 1 518 нафар хорижий тил мутахассиси жалб этилган. Янги ўқув йилидан бошлаб уларнинг сонини 2 минг нафардан ошириш режалаштирилган.
Билим ва малакаларни баҳолаш агентлиги маълумотларига кўра, 2026–2027-ўқув йили учун олий таълим муассасаларига ҳужжат топширган чет тиллари бўйича миллий ёки халқаро сертификатга эга абитуриентлар сони 125 минг 354 нафарни ташкил этмоқда.
Шунингдек, барча фанлардан миллий ёки халқаро сертификатга эга қарийб 13 минг нафар абитуриент кириш тест синовларидан озод қилинган.
