5 йиллик иш стажига эга фуқароларга олийгоҳга тавсиянома берувчи ташкилотлар рўйхати тасдиқланди

Олий таълим, фан ва инновациялар вазирлиги иқтисодиёт тармоқларида камида 5 йил иш стажига эга фуқароларни давлат олий таълим муассасаларининг кечки таълим шаклига тавсия этиш ҳуқуқига эга вазирлик, идора ва йирик хўжалик бирлашмалари рўйхатини тасдиқлади.

 

Тасдиқланган рўйхатдан жами 87 та вазирлик, идора, давлат органи, агентлик, уюшма ва йирик корхоналар ўрин олган. Улар қаторида Олий Мажлис Сенати, Қонунчилик палатаси, Президент администрацияси, Вазирлар Маҳкамаси, шунингдек, Адлия, Соғлиқни сақлаш, Ички ишлар, Мудофаа, Энергетика, Рақамли технологиялар ҳамда Олий таълим, фан ва инновациялар вазирликлари бор.

 

Бундан ташқари, Марказий банк, тижорат банклари, Солиқ қўмитаси, Божхона қўмитаси, Миллий статистика қўмитаси, “Ўзбекнефтгаз”, “Ўзбектелеком”, “Ўзавтосаноат”, “Ўзбекистон темир йўллари”, Навоий ва Олмалиқ конь-металлургия комбинатлари, “Ҳудудий электр тармоқлари”, “Ўзгидроэнерго” ва “Ўзсувтаъминот” ҳам тавсиянома бериш ҳуқуқига эга ташкилотлар қаторига киритилган.

 

Қайд этилишича, ушбу ташкилотларнинг тавсияномасига эга абитуриентлар давлат олий таълим муассасалари бакалавриатининг кечки таълим шаклига суҳбат натижаларига кўра табақалаштирилган тўлов-контракт асосида ўқишга қабул қилинади.

 

Маълумот ўрнида, 17 июль куни Таълим ташкилотларига қабул қилиш бўйича давлат комиссияси 2026/2027-ўқув йили учун давлат олий таълим муассасаларига қабул параметрларини тасдиқлаган. Бакалавриат ва магистратура босқичлари учун қабул квоталари, давлат грантлари ҳамда мақсадли қабул кўрсаткичлари ҳам белгиланган.