Янги Наманганда IТ-парк қурилишига тамал тоши қўйилди

 

Президент Шавкат Мирзиёев Давлатобод туманидаги Янги Наманган шаҳарчасида IТ-парк қурилишига тамал тоши қўйиш маросимида иштирок этди.

 

Қайд этилганидек, жорий йил бошидан Наманган вилоятига 2 миллиард доллар хорижий инвестиция жалб этилган. Хитой, Туркия, Ҳиндистон ва Россиялик ҳамкорлар билан ҳамкорликда умумий қиймати 1,8 миллиард долларлик 20 та янги лойиҳа ишга туширилмоқда. Ушбу лойиҳалар ҳисобига 6,5 мингта иш ўрни яратилиши, 30 дан ортиқ янги маҳсулот ишлаб чиқарилиши, вилоят иқтисодиётига 3,6 триллион сўмлик айланма ҳамда 200 миллион долларлик экспорт ҳажми қўшилиши кутилмоқда.

 

Шунингдек, вилоятда саноат, туризм, савдо ва уй-жой қурилиши йўналишларида қиймати 4 миллиард долларлик 28 та янги лойиҳага ҳам старт берилди.

 

Президент Наманган вилоятида 1,6 миллиондан ортиқ ёшлар истиқомат қилаётгани улкан ижтимоий-иқтисодий салоҳият эканини қайд этди. Ёшларни ахборот технологиялари ва сунъий интеллект йўналишларида замонавий касбларга ўқитиш орқали юқори даромадли иш ўринларини яратиш муҳимлиги таъкидланди.

 

Хитойлик ҳамкорлар билан ҳамкорликда умумий қиймати 117 миллион доллар бўлган лойиҳа асосида Янги Наманган, Самарқанд, Чирчиқ, Нурафшон, Урганч ва Навоий шаҳарларида замонавий IТ-парклар барпо этилиши режалаштирилган. Янги Наманган IТ-парки мазкур лойиҳанинг илк босқичи ҳисобланади.

 

1,7 гектар майдонда қуриладиган 17 қаватли мажмуанинг умумий майдони қарийб 18 минг квадрат метрни ташкил этади. Унда таълим ва экспорт марказлари, коворкинг ва офис майдонлари, стартап акселератори ҳамда хорижий компанияларга хизмат кўрсатиш тизими йўлга қўйилади.

 

Мажмуада ўнлаб компаниялар ва стартап студиялар фаолият юритиши, 2 мингга яқин ёшлар учун юқори даромадли иш ўринлари яратилиши кўзда тутилган. Лойиҳа вилоятда ахборот технологиялари хизматлари ҳажмини йилига 500 миллиард сўмга, экспорт ҳажмини эса 30 миллион долларга етказишга хизмат қилади.

 

Маросим якунида Президент Шавкат Мирзиёев Янги Наманган IТ-парки қурилишига тамал тошини қўйди. Шунингдек, вилоятда янги лойиҳаларни ишга тушириш ва қурилишига старт бериш маросими бўлиб ўтди.